14 қарашада Қазақстанда Әлеуметтанушылар күні атап өтіледі. Осы кәсіби мереке қарсаңында 2022 жылғы 11 қарашада Астана қаласында «Жас әлеуметтанушыларды дамыту және насихаттау» атты дөңгелек үстел өтті.
Шараны биыл құрылғанына 20 жыл толып отырған Қазақстан Әлеуметтанушылар Қауымдастығы жанындағы Жас әлеуметтанушылар форумы ұйымдастырды.
Дөңгелек үстелге еліміздің жетекші ғылыми орталықтары, Астана IT университетінің оқытушылары мен студенттері (astanait.edu.kz), Л.Н.Гумилев атындағы ЕҰУ (enu.kz), әл-Фараби атындағы ҚазҰУ (kaznu.kz) және Қазақстанның басқа да университеттері қатысты. Кездесу гибридті форматта өтті: елордалық сарапшылар үшін офлайн және Қазақстанның басқа аймақтары үшін онлайн форматта.
Дөңгелек үстелде еліміздегі жас әлеуметтанушылар қауымдастығының даму перспективалары мен жоспарлары, жоғары оқу орындарының сапалы кадрлық әлеуетті қалыптастырудағы рөлі, әлеуметтанушылар жұмысындағы түйткілді мәселелер талқыланды.
Іс-шараның басты жаңалығы «Елбасы Академиясы» корпоративтік қоры жүзеге асырып жатқан «Kazakhstan Sociology Lab» Қазақстандағы тұңғыш әлеуметтанушылар мектебінің тұсаукесері болды. Жоба базалық әлеуметтанулық білімі ғана емес, сонымен қатар деректерді жинау және талдау үшін заманауи цифрлық технологиялармен жұмыс істеу дағдылары бар кең профильді мамандарды даярлауға бағытталған. Мектепте оқыту әдістеріне ерекше назар аударылады, мысалы, кәсіби дағдылар, R-де сандық талдау, деректерді алдын-ала және кейінгі өңдеу, сапалы, квазиэксперименттік зерттеу әдістері және т.б.