Astana IT University ашықтық пен адалдық қағидаттарын ұстана отырып, барлық білім алушылардың мүддесін ескере, емтихандық бақылау рәсімдерін жүзеге асырады. Прокторинг жүйесі – университеттің академиялық адалдықты сақтау, білім алушылардың жауапкершілік мәдениетін қалыптастыру, білімге құрметпен қарау және этикалық нормаларды сақтау саясатының бір бөлігі.
Прокторинг – бұл әлемнің жетекші жоғары оқу орындарында қолданылатын халықаралық тәжірибе, себебі ол емтихан нәтижелерінің шынайылығын және емтихан процесінің әділдігін қамтамасыз етуге мүмкіндік береді.
Astana IT University-де OES (Online Exam System) прокторинг жүйесі қолданылады. Бұл жүйе емтихан тапсыру кезінде ашықтық, объективтілік және тең жағдайды қамтамасыз етуге бағытталған. Камера мен микрофонды пайдалану прокторингтің міндетті элементі болып табылады, себебі ол білім алушының жеке басын анықтауға және үшінші тұлғалардың қатысуының алдын алуға мүмкіндік береді.
Экран жазбасы тек емтихан кезеңінде жүргізіледі және тапсырмаларды адал орындауды бақылау мақсатында ғана пайдаланылады. Камера, микрофон және экран жазбалары тек емтихан кезінде жүзеге асырылады, қорғалған серверлерде сақталады және тек академиялық адалдықты қамтамасыз ету үшін қолданылады. Дербес деректерді өңдеу «Жеке деректер және оларды қорғау туралы» Қазақстан Республикасының Заңына және ақпараттық қауіпсіздік саласындағы өзге де нормативтік актілерге сәйкес реттеледі.
OES жүйесі дыбыс немесе қозғалыс үшін емтиханды автоматты түрде бұғаттамайды. Жүйеде түрлі деңгейдегі ескертулер қарастырылған: бас пен көздің қысқа мерзімді қозғалысы, кездейсоқ шу, артта өтіп бара жатқан адам немесе жарықтың өзгеруі бұзушылық болып саналмайды және емтихан нәтижесіне әсер етпейді. Жүйе тек қосымша тексеруді қажет ететін сигналдарды ғана белгілейді. Барлық жазбалар проктор мен емтихан алушы тарапынан қолмен қаралады, ал қажет болған жағдайда академиялық этика жөніндегі комиссиямен талқыланады. Ешбір шешім автоматты түрде қабылданбайды. Егер білім алушы тыйым салынған материалдарды пайдаланбаса және академиялық адалдықты сақтаса, ол емтиханды сәтті тапсыра алады.
Интернет немесе жабдықтағы техникалық ақаулар туындаған жағдайда, білім алушы прокторды хабардар етіп, белгіленген тәртіп бойынша өтініш бере алады. Ондай жағдайда жүйе қайта қосылуға мүмкіндік береді, ал бағалауда әділетсіздік болдырмау үшін әр жағдай жеке қаралады.
Түсіндіру жұмыстарын жүргізу мақсатында университеттің академиялық жұмыс жөніндегі проректоры мен цифрландыру жөніндегі проректоры білім алушылармен ашық кездесу өткізді. Кездесуде келесі мәселелер талқыланды: прокторинг жүйесімен емтихан өткізу әдістемелік ерекшеліктері; ұйымдастырушылық рәсімдер; OES жүйесінің техникалық параметрлері; төмен, орта және жоғары деңгейлі ескертулер критерийлері; бұзушылық болып саналмайтын жағдайлар.
Білім алушылар сұрақтарын қойып, ұсыныстарын білдірді. Олардың пікірлері нұсқаулықтар мен түсіндірме материалдарын нақтылау барысында ескерілді.
Astana IT University әрқашан ашық диалогқа дайын және барлық білім алушылар үшін емтихан тапсырудың әділ, ашық әрі қолайлы жағдайларын қамтамасыз етуге ұмтылады.
Баспасөз қызметі
+77075751089