2025 жылғы 20–21 қазанда Astana IT University базасында AI Science Hackathon 2025 атты жасанды интеллект бойынша ғылыми хакатон өтті. Іс-шараны Қазақстандағы жасанды интеллектті дамыту қауымдастығы, Young Researchers Alliance және Astana IT University бірлесе ұйымдастырды.
Хакатонға шамамен 100 ғалым, зерттеуші және сала сарапшысы қатысты. Екі күн ішінде қатысушылар жасанды интеллект технологияларын пайдалана отырып, өзекті ғылыми және қолданбалы мәселелерге арналған 23 жоба тұжырымдамасын әзірледі.
Нәтижесінде төрт жоба жеңімпаз атанды, олардың әрқайсысы 10 миллион теңгеге дейін қаржыландыру мүмкіндігіне ие болды (КДЛ Олимп және Respublica партиясынан).
AI Science Hackathon 2025 жеңімпаздары:
EpiQ AI — медициналық деректерді талдау негізінде зертханалық реагенттерге деген сұранысты болжау және сатып алу процестерін оңтайландыру моделі.
AI-YM — қазақ ым тілін тану және генерациялау жүйесі, инклюзивті білім беруді дамытуға бағытталған.
TandauAI — студенттер мен оқушыларға қызығушылықтары мен еңбек нарығының үрдістері негізінде саналы білім таңдау жасауға көмектесетін интеллектуалды жүйе.
Виртуалды медициналық ассистент жүйесі — медициналық құжаттаманы автоматтандыруға және диагностикалық шешімдерге қолдау көрсетуге арналған AI шешімі.